Kataluna Esperanto-Asocio


Bibliotekoj

Hejmpaĝo > Bibliotekoj > Muzeo de Esperanto de Subirats

Muzeo de Esperanto de Subirats

Strato de Dr. Zamenhof 12, Sant Pau d’Ordal, Subirats

La Muzeo de Esperanto de Subirats (MES), antaŭe konita kiel “Hispana Esperanto-muzeo”, estas privata kolekto situanta en la vilaĝo Sant Pau d’Ordal, en la komunumo de Subirats, regiono Alt Penedès. Kun 108 metroj da bretoj da libroj, 78 da revuoj kaj 20 da arĥivo, ĝi estas la biblioteko de Esperanto plej vasta el ĉiuj latinidaj landoj, superata nur de la Centro de Dokumentado kaj Esploro pri la Lingvo Internacia en La Chaux-de-Fonds (Svisio) : nek en Hispanio, nek en Francio, nek en Italio nek en la tuta Latinameriko troviĝas komparebla kolekto.

Oni kalkulas ke la muzeo enhavas ĉirkaŭ 25000 dokumentojn rilatantajn al Esperanto kaj aliaj artaj lingvoj. La gazetujo estas la plej rimarkinda parto de la kolekto, kun 15000 bultenoj kaj gazetoj korespondantaj al 400 malsamaj titoloj ; estas aparte gravaj pro sia malofteco la kolektoj de gazetoj en aliaj artaj lingvoj kiel Ido kaj Interlingua.

La nombro da libroj atingas 12000 ; la fako de afiŝoj kaj broŝuroj, ĉefe rilatantaj al kongresoj, estas kalkulita je 1500. La kolekto de poŝtkartoj sumas, inter esperantaj kaj neesperantaj, je 150000 ekzempleroj. Krome, tie sin trovas granda nombro da objektoj rilatantaj al Esperanto kiel sigeloj, medaloj, flagoj...

La katalogo de MES estas konsultebla klakante ĉi tie.

Lluís Hernández Yzal La muzeo rezultis de tuta vivo da kolektado de la apotekisto Lluís Hernández Yzal (Barcelona, 1917 - Sant Pau d’Ordal, 2002) kun la helpo de lia edzino, Teresa Massana. MES estis inaŭgurita la 5an de majo de 1968, okaze de la 10a Asembleo de Esperantistoj de la Provinco de Barcelono havanta lokon en Sant Pau d’Ordal, kiel aneksaĵo de la apoteko de la fondinto. De tiu tago la vilaĝo havas straton dediĉitan al Dr. Zamenhof, ĝuste kie situas la nuna domo de la muzeo (en la numero 12), kiu estis konstruita en 1974 precize por loĝigi la kreskantan kolekton.

Post la morto de la fondinto, la 10an de aprilo de 2010 MES estis oficiale remalfermita, danke al iniciato entreprenata de diversaj flankoj : la heredinto kaj konservanto Rafel Hernàndez Massana, la Turisma Patronaro de Subirats kaj Kataluna Esperanto-Asocio. Nuntempe, la Turisma Patronaro okazigas gvidatajn vizitojn al MES.





Associació Catalana d'Esperanto / Kataluna Esperanto-Asocio

Hotel d'Entitats Can Guardiola, carrer Cuba, núm. 2, 08030-Barcelona (Països Catalans)
Tel +34 93 716 36 33
Fax +34 93 716 36 33